بنات شمال - يعنى ايه واحدة بنت يتقال عليها شمال ؟!

يعنى ايه واحدة بنت يتقال عليها شمال ؟!

Advertisement

فى الفتره دى الكلام كتر قوى فى النقطة دى بالذات ان اى شاب مش ” عاجبه ” بنت معينة ..

فيقول عليها ” اصلها شمال ” ،  و فى الغالب بيبقى ساعتها بيكسر جواه حاجز الضعف ان البنت دى مش عارف يكلمها او يوصلها ..” من وجهة نظره ” ..

العادات السيئة دايما بتبقى على الكل سيئة و اثارها واحد .. بس للاسف فى المجتمع اللى احنا فيه ده مش واحد .. و كلمة ” عشان احنا مجتمع شرقى ” .. دى عباره فاشلة لانها عيب مش ميزه انك تمرر سيئات مجتمع على شباب يعملوها عادى و لما البنت تعملها تبقى شمال ..

عادة الشاب بيقول على البنت ” شمال ” لما تكلم ولاد كتير .. ” هو ” مش منهم .. ولو حتى كان هو نفسه بيكلم بنات كتير و البنات الكتير دول بيكلموا شباب كتير بيقول عليهم فى الغالب بس مش قدامهم عشان يفضل يكلمهم .. 

بنات كتير متعرفش الكلام ده اكيد بس انا عارف الشباب بتقول ايه .. ” مهما كانت درجة الصداقة ” ..

لو البنت شمال عشان بتشرب سجاير .. اومال انت تبقى ايه و انت بتشرب سجاير و شيشة و حشيش  و و و !!

لو البنت شمال عشان بتكلم شباب كتير اومال انت تبقى ايه و انت ” بتبص ” على كل واحده معديه و ساعات لو يوم ” اللى تعرفهم ” نفسهم لابسين حاجة كده و لا كده .. غرايزك الحيوانية مبتقدرش تتحكم فيها و برده بتبص عليها بالرغم من انها صاحبتك ” اللى مش شمال ” ..

اشمعنى اغلب الشباب اللى بيبصوا على البنات .. البنات دى  بياخدوا زى رخصة انهم ما يتبصش عليهم منك زي بقيت البنات ؟!

يعنى انت اهو بتقدر تتحكم فى نفسك ” ساعات ” و متبصش على بنت تعرفها و بتعاملها زى اختك !! عشان بس ” عيب ” تبص على واحده تعرفها و تعرفك .. و لا عشان خايف تشوفك فجأة و انت بتبص عليها ! 

Advertisement

كل شاب بيصنف البنت ” الشمال ” من مفهومه هو .. بس اللى ان شايفه ان اللى يصنف الناس كده على مزاجه بتبقى دماغه هى اللى ” شمال ” ..